స్వీయ రచన 

ఆ. వె 

సమయ మున్న వేళ  సంపదలేదాయె /

సంపద కలుగంగ సమయలేమి /

సమయ సంపదలును చాలినంతయునున్న/ 

అనుభవించ శక్తి అసలు లేదు .

ఆ.వె 

అప్పు లేని వాడె యందరి కంటెనై 

శ్వర్య వంతుడవని బరికిఁపంగ  

అప్పు చేయు మనిషి  అప్పులలో మున్గు 

నవని లోన కాన నరసి బ్రతుకు 

అప్పు = ఋణము , నీరు 

-డా. కోమలరావు 

డా. కోమలరావు బారువ .21/11/2022

 

రైతు -బుగత 

భూమిని నమ్మిన రైతు అందరికి కూడు పెడుతున్నాడు. 

భూమిని అమ్మిన  బుగత అందరి నోట్లో మట్టి కొడుతున్నాడు .

భూమిని నమ్మి (దున్ని)  చెమట చిందిస్తున్నాడు రైతు 

భూమిని అమ్మి కాసులు చేసుకుంటున్నాడు బుగత. 

బుగత మేడలు మీఁద మేడలు కడుతున్నాడు .

రైతు పాడె మీఁదకి వెళుతున్నాడు. 

రైతుకు ఎరువులిచ్చేందుకు  బ్యాంకులో సొమ్ములు కరువు.

బుగతకు అరువులిచ్చేందుకు ( loans ) బ్యాంకులు పరుగు పరుగు .

రైతుకు లోనివ్వాలంటే సవాలక్ష క్వరీసు .

బుగతకు లోనివ్వాలంటే  లేవే ఎన్క్వరీసు .

రైతు దృష్టి ప్రజల కడుపు నింపడం పైన .

బుగత దృష్టి ప్రజల కడుపులు  కొట్టడం పైన .

ఇన్ని చేసిన రైతుకు తిరస్కారము .

అన్ని దోచిన బుగతకు పురస్కారము .

-కోమలరావు

 ఆ .

ముప్పదేండ్లు గడచె గొప్పగు ప్రాక్టీసు 

చేసి , కీళ్ళు సడలె చేతి వేళ్ళు 

వణకె  ;భక్తి కలిగి ( ధర్మ మెరిగి ) బ్రతుక వలె మనము 

చింత లేక శేష జీవితంబు

14/11/2022

ముప్పదేండ్లు గడచె గొప్పగు ప్రాక్టీసు 

చేసి , కీళ్ళు సడలె చేతి వేళ్ళు 

వణకె  ; సమయమయ్యెను రహి భక్తి 

కలిగి జీవితంబు గడప వలెను 

14/11/2022

దైవ సృష్టి.       

      

క. 

 ఉప్పును సృజించితివి నీ/

వప్పుల , సహకార తరువు నవనిన్ గరిమన్ 

 గొప్పగ రెంటిని తగ నే /

ర్పొప్పన్  గల్పితివి నిన్ను పొగడన్ తరమే.      

-కోమలరావు 

 తెలుగు భాష 

తే. 

ఇంచు రసమును రుచిలోన మించుభాష /

పాల కన్నను తెల్లని స్వచ్ఛ భాష /

పశ్చిమాదులు మెచ్చిన ప్రాచ్య భాష /

రాయలు పొగడిన  తెలుగు రమ్య భాష .

డా. కోమలరావు 

ఇంచు = చెఱకు

 దాశరథి కి నివాళి 

కవిత్వ సంపదకు శరథి / గభీరతా ఉదధి 

గభీరతకు మహోదధి దాశరథి 

తెలంగాణ గడ్డపై పుట్టిన ధీమణి 

నిరంకుశ పాలనకు ఎక్కుపెట్టిన గుణి 

ఆంధ్ర దేశ ఆస్థాన పీఠి నలంకరించినవాఁడు /ధీనిధి 

అలనాటి చిత్రసీమను పాటలతో నలరించినవాఁడు ./ ముంచెత్తిన పయోనిధి 

నైజాము పాలకుల తూర్పార పట్టిన ' అగ్నిధార' 

బడుగు పేదల వెతల కతల వాణి 'రుద్రవీణ' 

కవితలెన్నొ వ్రాసి. ఘనత కెక్కినఘనుఁడు 

బిరుదులెన్నొ గొన్న ' కవిసింహము '

రచన లెన్నొచేసి రాణ కెక్కిన కళారవి 

మన దాశరథి కృష్ణమాచార్య సుకవి .

డా కోమలరావు 

 తరువులు 

తేటగీతి మాలిక 

అరయ తరువులు పక్షుల కాశ్రయంబు /

మానవాళికి నిచ్చు ను మంచి గాలి /

పథిక మార్గ శ్రమము నెంతొ బాపు తరువు /

ఫలములిచ్చి మనుషుల యాకలిని తీర్చు /

తరువులెండిన యగు వంట  చెఱకు మనకు /

ఇలను దున్నఁగ ఘన మగు హలము కాదె /

తరువు పాడెయౌ మనుషుల మరణ వేళ /

కాయములు కాల్చఁగ రహి కట్టె యగును /

తరువులీ భువి కెంతయు బరువులౌనె /

తరువులను  పెంచ వలె  మన తనయు లట్లు .

డా. కోమలరావు బారువ 3/11/2022