తత్త్వము
ఆ.వె
వచ్చి నపుడు నీవు తెచ్చినదేమి రా ?
చచ్చు నపుడు వెంట వచ్చు నేది ?
నడుమ స్వార్ధ మేల ? నాదినీదని యేల ?
తెలిసి బ్రతుకు మోయి తెలివి గలిగి .
కోమలరావు
చక్కనిపద్యం వెలయించిన
డా. శ్రీ కోమలరావుగారికి అభినందనలండి.
ఏదయినా ఒక సాహిత్యాంశాన్ని విశ్లేషణాత్మకంగా వ్యాఖ్యానించటమెలా?- యనే ఆలోచనలో కొంతసరదా యభ్యాసమిది:
మురువుగొల్పేచిన్నిఆటవెలఁది పద్యం.
ఆధ్యాత్మిక విషయసమా
లోచనలో నువ్వు-నేనే పాత్రలయితేబాగు.
ఎక్కువ మనకే అన్వయిస్తున్న 'ఫీల్' ఉంటుందండి.
ఏదో జీవాత్మ- పరమాత్మ లాగ!
ఒకపరి జననం ఒకపరి మరణం ("పునరపి..." బాపతే!)
ఆధ్యాత్మిక విషయాల్లో పెద్దపెద్ద సమోసాలు అక్కర్లేదండి.
అలఁతియలఁతిపదాలరచన చెప్పే- వినే హృదయాల్ని అలరిస్తుంది. కవిత్వానికి సరయినపదం
సరైనచోటపడాలి.అందులోనూ వేదాంతవిషయాల్లో మరీ అవసరం.
'స్వార్థం'- తప్ప ఈ పద్దెంలో సంస్కృత పదంమరొకటి
లేదండి.ఇదొకవిశేషం.
వచ్చు- చచ్చు-తెచ్చు- నాది- నీది.... వీనికి నిఘంటువు చూస్తివా--- ''కుప్పుస్వామయ్యర్ మేడ్ డిఫికల్ట్!"--కాదూ?!
మాతృగర్భంలోంచి ఈ లోకంలోకి ఊడిపడినపుడు
మనమేమి తేలేదు---! అమ్మ స్తన్యమే పాథేయం!
"పుట్టుటయు నిజము- గిట్టుటయు నిజము-!" నట్టనడిమి నాటకంలో
నీకున్నదేమి?- వట్టి భ్రాంతిమయాహారం!ఆహార్యం!
దానికై నరుడెంత స్వార్థపరతని ప్రదర్శిస్తాడు!
నాదేమి? నీదేమి?-
సర్వంశూన్యంశూన్యం!
సర్వం క్షణికం క్షణికం!
"వెంటవచ్చునేది?"-- మహానుభావులనిపించుకున్న భారతవీరులు-మహాపతివ్రత
ద్రోవది మహాప్రస్థానం సాగిస్తున్నపుడు...పరిపూర్ణ
ధర్మమతులు కానికారణంగా ఒక్కొక్కరే పడిపోయారు. పరిపూర్ణధర్మజ్ఞుడగు ధర్మరాజు వెంట ఏమీ రాలేదు
-- కేవలం ఆయన నమ్మిన ధర్మగుణమొక్కటి విశ్వాసపాత్రమగుశునక రూపంలో వచ్చింది.
ఆ పరసుఖజగత్ ప్రవేశద్వారానుమతిపత్రం--- నువ్వాచరించినమంచియొక్కటే!
"The final robe we wear has no pockets!"-- అన్న ఆంగ్లోక్తి నాకు ఎంతోనచ్చిన సూక్తి!
ఇంక,నడుమ నాదినీదని ఏల గోల?!-అన్నారుకవికోమలంగా!
"తెలిసి బ్రతుకు మోయి!"--
ఒరేయ్ అబ్బాయ్! తెలిసి బ్రతుకుభారాన్నిమోయవయ్యా!--అంటే సరికదా!
కాని కవి అక్కడతోఊరుకుంటే పెద్దగాచెప్పుకోనక్కర్లేదుకదండి.
"తెలివి గలిగి"-- అని గొప్ప ముక్తాయింపు ఎంత యింపు
గానో వదిలారు!
జ్ఞానముంటే సరిపోదోయ్ పంతులూ! వివేకం చాల
అవసరంసుమా!
వివేకమంటే--ఆచరణ!
ఆచరించే బుద్ధి!
అది లేకపోతే ఎంత తెలిస్తే నేమి?
అంతా గడ్డిపోచంత తేలిక!
పద్యం క్రింద కోమలరావుగారి
పేరు లేకపోతే----
ఎవరి పద్యం అని అడిగితే
మకుటంలేని (వేమన) మహారాజు! అనేస్తాం!
(వేమనగారు రాజుగారి తమ్ములుంగారే!)
"ఏమి గొంచు వచ్చె? ఏమి తాఁ గొనిపోవు
పుట్టువేళ నరుడు గిట్టువేళ
ధనము లెచటి కేగు? తానేగు నెచటికి?
విశ్వదాభిరామ!వినురవేమ!!"
కోమలరావుగారు పద్యంలో
'రా' కట్టారు!! సమంజసమేనా- అంటే......
"....కవితలోన యుద్ధములోనన్
వన్నెసుమీ రాకొట్టుట!...."!!
అభినందనలందుకోండి కోమలరావుజీ! మరొక్కమారు!!
💐💐🙏🙏
